EXPOSICIÓN DE MOTIVOS

     Por medio da presente Ordenanza non fiscal, e de conformidade cá Lei 7/1985, de 2 de Abril, Reguladora do Réxime Local, co Código Civil e con calquera outra normativa de pertinente aplicación, o Concello de Avión proponse regula-las actividades e comportamentos relativos ó medio ambiente, co obxecto de consegui-las axeitadas condicións de limpeza de maleza nos terreos e predios para evita-lo risco de incendios.
     A presente Ordenanza é de obrigado cumprimento para tódalas persoas, tanto físicas como xurídicas, que teñan os seus terreos e soares dentro do termo municipal do Concello de Avión.

Artigo 1º.- Limpeza de terreos e soares:
         1. A limpeza dos terreos e soares, tanto de propiedade privada como das administracións públicas ou dos seus organismos autónomos, que se atopen dentro do termo municipal de Avión correspóndelle ó seu propietario ou usufructuario.
          2. Os propietarios ou usufructuarios dos terreos e soares que se atopen no perímetro dos 100 metros contados dende a última construcción de cada núcleo de poboación deberán mantelos rozados e limpos na súa totalidade, e deberano facer cá periodicidade na que sexa necesaria a súa limpeza, ou ben que se aprecie que a maleza existente ten risco de incendio, tanto para as vivendas como para a masa forestal.
          3. Igualmente, os propietarios ou usufructuarios dos terreos e soares antes mencionados deberán proceder a súa desinfección e desratización periódica.
.

Artigo 2º.- Xestión e inspección:
     O Concello de Avión, a traveso da Alcaldía ou do Concelleiro en quen delegue, xestionará o cumprimento das actividades e obrigas reguladas e establecidas na presente Ordenanza, impoñendo ou propoñendo a imposición, segundo os casos, das sancións que procedan, segundo o establecido nos artigos seguintes.

Artigo 3º.- Imposición de sancións:
          1. As sancións polas infraccións tipificadas nesta Ordenanza son competencia do Sr. Alcalde, o cal poderá impoñelas de oficio ou a instancias do Concelleiro no que houbese delegado a xestión e inspección, segundo o previsto no artigo anterior.
          2. Toda persoa natural ou xurídica poderá denunciar diante do Concello as infraccións da presente Ordenanza en relación cá materia a que esta se refire.
          3. As responsabilidades derivadas do incumprimento das obrigas sinaladas nesta Ordenanza serán esixibles non só polos actos propios senón tamén polos daquelas persoas de quen se deba responder.

Artigo 4º.- Consideracións das infraccións:
          1. Considéranse infraccións administrativas en relación cás materias ás que se refire esta Ordenanza, os actos ou omisións que contraveñan o establecido nas normas que integran o seu contido.
           2. As infraccións clasifícanse como leves, graves e moi graves, conforme se establece nos artigos seguintes.

Artigo 5º.- Infraccións leves:
        1. Non proceder á roza e limpeza periódica dos terreos e soares, unha vez notificada a obriga desta e transcorrido o prazo que se sinale.
        2. Non proceder á desinfección e desratización periódica dos terreos e soares, unha vez notificada a obriga desta e transcorrido o prazo que se sinale.
        3. En xeral, o incumprimento dos requisitos, obrigas e prohibicións establecidos nesta Ordenanza e que non estean recollidos como graves ou moi graves.
.

Artigo 6º.- Infraccións graves:
        1. A reincidencia nas infraccións leves.
        2. Non proceder á roza e limpeza dos terreos e soares cando se aprecie que a maleza existente ten risco de incendio, tanto para as vivendas como para a masa forestal, unha vez notificada a obriga desta e transcorrido o prazo que se sinale.
        3. Non permitir o acceso ó persoal autorizado do Concello, no caso de comprobación de unha denuncia.
        4. En xeral, todas aquelas non cualificadas expresamente como leves ou moi graves.

Artigo 7º.- Infraccións moi graves:
Consideraranse infraccións moi graves aquelas graves nas que concorran, ademais, algunha ou varias das seguintes circunstancias:
          a) A reincidencia nas infraccións graves.
          b) Malicia ou intencionalidade.
          c) Irreversibilidade do dano causado.
          d) Grave repercusión nos recursos naturais ou deterioro destes.
          e) Calquera outra circunstancia de especial gravidade que quede acreditada no expediente sancionador que deberá tramitarse ó efecto e que xustifique esta cualificación.


Artigo 8º.- Sancións:
     1. Sen prexuízo de esixir, cando proceda, as responsabilidades de carácter penal ou civil correspondentes, as sancións polas infraccións dos preceptos da presente Ordenanza en materia de limpeza de terreos e soares e de protección contra incendios forestais no Concello de Avión serán as seguintes:
          a) Infraccións leves: multa dende 100,00 ata 750,00 €uros.
          b) Infraccións graves: multa dende 751,00 ata 1.500,00 €uros.
          c) Infraccións moi graves: multa desde 1.501,00 ata 3.000,00 €uros.
     2. Nos supostos de non cumprir con estas obrigas, ou na reincidencia de calquera das infraccións moi graves, o Concello de Avión poderá proceder a adopta-las medidas protectoras e correctoras que considere oportunas, incluso propor a adopción de medidas excepcionais por parte de outras administracións públicas, así como poderá subrogarse nas obrigas dos propietarios e usufructuarios, pasándolles as costas o seu cargo.

Artigo 9º.- Determinación da contía das sancións:
          1. Para determina-la contía das sancións atenderase ás circunstancias concorrentes nos feitos que as motivaron, tales como a natureza da infracción, grao de intencionalidade e/ou reincidencia, así como aqueles factores que se poidan considerar como atenuantes ou agravantes.
          2. Será considerado reincidente quen houbera incorrido en infraccións das previstas na presente Ordenanza e sobre as que xa recaera unha resolución sancionadora.

Artigo 10º.- Procedemento de constrinximento:
          1. As sancións notificadas e non satisfeitas en prazo faranse efectivas pola vía de constrinximento, de acordo cás normas do Regulamento Xeral de Recadación, devengando, igualmente, o recargo de apremio e, no seu caso, intereses de demora.
          2. Da garantía do pago das sancións, así como dos recargos, intereses e gastos que puideran impoñerse ou devengarse, no seu caso, responderán, principalmente, os terreos e soares obxecto das infraccións.

Artigo 11º.- Responsabilidades dos infractores:
          1. A imposición de unha sanción por infracción do previsto na presente Ordenanza non eximirá ó infractor do cumprimento das súas obrigas nin o exonerará de outras responsabilidades de carácter civil ou penal en que puidera incorrer ca súa conducta, podendo dar lugar á tramitación de diferentes expedientes, tanto administrativos como ante outras xurisdiccións, e á adopción de distintas medidas, incluso de emerxencia, de excepción ou de subrogación, segundo proceda, pola reiteración continuada das infraccións.
          2. O establecido na presente Ordenanza enténdese sen prexuízo das actuacións que correspondan a outros organismos da Administración dentro das súas respectivas competencias ou dos procedementos que se puideran interpoñer ante as distintas xurisdiccións.

Artigo 12º.- Declaración de urxencia:
Atendendo á natureza e gravidade das materias reguladas na presente Ordenanza, declárase de urxencia a tramitación de calquera expediente tanto de inspección e vixilancia como sancionador en tódolos seus trámites, incluídos os de información pública, no seu caso, e audiencia dos interesados

           A presente redacción desta Ordenanza Fiscal foi aprobada polo Pleno do Concello de Avión na súa sesión do 19 de novembro de 2004.